Хуманоста не познава граници, а најмалку географски. Трогателните стории кои порталот www.aberdzija.com ги објави неодамна за четиригодишната Ања Арсовска од Кратово и Христина Николовска (21) од кратовското село Куклица, благодарение на интернетот допреа преку Атлантикот до срцата на нашите поранешни сограѓани, а денеска жители на милионскиот Чикаго. Желбата на Ања и на Христина да проодат, да застанат цврсто на нозе, не е ништо помала од желбата на десеттина хумани кратовци да помогнат на две невини души кои сакаат подобар живот. 

Малата иселеничка колонија од Кратово сместена во урбаната чикашка џунгла, деновиве се организирала во намерата да помогне на Ања и Христина, а во тоа помогнале и неколку нивни пријатели - Македонци кои живеат во Чикаго. Набрзина собрале 2.000 долари, а еден од нив допатува деновиве во Кратово за да ја предаде донацијата од по 1.000 долари за двете девојчиња. За овој хуман гест навистина заслужуваат честитки, а секако и благодарност од семејствата на двете девојчиња.
Надеж дека на Ања и Христина ќе им се подобри квалитетот на живеење дефинитивно има. Семејството Арсовски посочи дека нивната Ања кон крајот на месецов заминува на толку очекуваното медицинско испитување во Истанбул, а прибирањето на потребните средства оди со посакуваната динамика. И Христина се надева дека наскоро ќе се соберат првите 5.000 евра за операција на долните екстремитети, а операциајта на рацете би можела малку и да почека.
Како и да е, работите благодарение на добрите луѓе одат на подобро. Впрочем, една етичка порака гласи: „Зол може да се биде на 1.001 начин, а добар само на еден“.   пишува - Оливер Арсовски