Иако во оптек беше заминување во традиционалната зимска база во Охрид, раководството на фудбалскиот клуб Силекс одлучи зимските подготовки комплетно да се реализираат во Кратово и Пробиштип. Условите за тренирање на стадионот во Кратово не се идеални, делумно заради врнежливото време, но и поради реновирање на соблекувалните, па од тие причини кратовци најчесто тренираат на градскиот стадион во соседниот Пробиштип.
Досега кратовци одиграа две контролни средби, и на двете беа поразени од Младост Лучани и Металург Скопје. За следната сабота е закажан дуелот со Еуромилк, а во недела ќе играат со Тетекс. И двата меча ќе се играат на терените на ФФМ во Ново Лисиче.
Засега нови имиња се Лоренцо Николовски, Кире Ристевски, Благојче Главевски и српскиот интернационалец Невен Радаковиќ, а се очекува голема помош од Влатко Коцев, кој ја залечи повредата и се враќа во комбинација за првите единаесет кај тренерот Зоран Штерјовски. Деновиве се шпекулира и со ангажман на Жарко Симјановски, кој сеуште на хартија е играч на Вардар, а есенската полусезона ја мина во Тетекс.