По шест кола во кои фудбалерите на Силекс немаат сеуште пораз, утре (16.00) му гостуваат на фаворизираниот тим на Шкендија во Тетово. Знаат добро кратовци дека во Тетово секогаш е жешко за гостинските тимови, но никој не помислува да тргне на пат со бело знаме. Умерен оптимист во редовите на Силекс е универзалецот Крсте Тодоров, кој бележи одлични настапи во првите неколку кола.
-Во Тетово клучна ќе биде тимската игра. Досега се боревме максимално и игравме колективен фудбал, ако демонстрираме таква игра и утре, можеме да се надеваме на поволен резултат. По првите шест средби увидовме дека можеме да играме против секого на рамноправна основа, па затоа ценам дека и против Шкендија нема лесно да се предадеме - вели Тодоров.
Домашниот тим е изразит фаворит на утрешниот меч, со коефициент 1.55 за победа, наспроти 5.50 за двојка. Тетовци имаат и нов тренер во името на Адриан Кознику, кој токму против Силекс ќе го има официјалното деби.
-Шкендија е во мала криза, три кола се без победа. Главен адут им е многубројната публика, која им е ветар во грб, но и голем притисок. Мораме максимално да внимаваме и на напаѓачот Бојан Вручина, кој е извонредно опасен напаѓач - заврши Тодоров, од кого очекиваме да го запише својот прв погодок во дрсот на Силекс.
Судија на мечот ќе биде Петар Мантев од Неготино.